මාතෘකාව
කෝට්ටේ යුගයේ සන්දේශ සාහිත්‍ය තුළ පුරුෂයා නිරූපණය කර තිබෙන ආකාරයගැටලුව
කෝට්ටේ යුගයේ සන්දේශ සාහිත්‍ය තුළ පුරුෂයා නිරූපණය කර තිබෙන ආකාරය කෙසේ ද? එම නිරූපණය කිරීමේ දී විවිධ සමාජ ස්ථරයන්හි පුරුෂයා නිරූපණය කර තිබෙන ආකාරය කෙසේ ද? එය තත්කාලීන සමාජය යථාර්ථය නිරූපණය කරයි ද? නැතහොත් මනංකල්පිත රූප නිරූපණය කරයි ද?හැඳින්වීම
සිංහල සාහිත්‍යයෙහි විශාල දියුණුවක් ලැබූ යුගයක් වශයෙන් කෝට්ටේ සාහිත්‍යය යුගය හැඳින්විය හැකි ය.මෙය හයවන පැරකුම් රජුගෙන් ලැබුණු නොමද රාජ්‍ය අනුග්‍රහය හේතු වූ බව කිව හැකි ය. ඒ සමඟ ම වන වාසි හා ග්‍රාමවාසී භික්ෂූන් අතර පැවති තරඟය හේතු කොට ගෙන ඉතා විශාල වශයෙන් පොත් බිහිවන්නට විය. මේ යුගය තුළ මහාකාව්‍ය,චන්ඩ කාව්‍ය, සන්දේශ කාව්‍ය හා නිගණ්ඩු වශයෙන් චතුර්විධ කාව්‍ය බිහිවිය.මේ අතුරින් සන්දේශ කාව්‍යවලට ප්‍රමුඛ තැනක් හිමි වී තිබේ. "තෙල් අඩු වූ පහනකට තෙල් දැමුවා සේ "ආලෝකයක් කෝට්ටේ යුගය තුළ ඇතිවීමට ප්‍රබල සාධකයක් ලෙස පංච මහා සන්දේශ කාව්‍ය බිහිවීම හේතුවිය. පරෙවි ,කෝකිල ,ගිරා, හංස සහ සැළලිහිණි සන්දේශ කාව්‍ය කෝට්ටේ යුගය ආලෝකවත් කළ සන්දේශයන් ය.
පරවි සන්දේශය තොටගමුවේ රාහුල හිමි ලියන ලද්දේ පරාක්‍රමබාහු රජුගේ සොයුරිය වන චන්ද්‍ර වතියට සුදුසු සැමියකු ලබාදීමේ පරමාර්ථයෙනි. යාපා පටුනේ සටන් වදින සපුමල් කුමරුට දේවාශීර්වාද පතා තිලක පරිවේනාධිපති හිමියෝ කෝකිල සංදේශය රචනා කළෝ ය. ප්‍රතිභාපූර්ණ කාව්‍ය නිර්මාණකරුවෙකු වූ ෂඩ් භාෂා පරමේශ්වර තොටගමුවේ රාහුල හිමියන්ගේ ගුණ වර්ණනා කරමින් උන්වහන්සේගේ ශිෂ්‍යයෙකු ගිරා සන්දේශය රචනා කොට ඇත. ලක්දිව හයවන පැරකුම් රජු ආරක්ෂා කරදෙන මෙන් ඉල්ලා කෑරගල වනරතන හිමියන් වෙත යැවූ හංස සංදේශය වීදාගම මෛත්‍රී හිමියන් රචනා කළෝ ය. හය වන පැරකුම් රජුගේ දියණිය වූ උලකුඩය දේවියට රාජ්‍ය පාලනය සඳහා පුතෙකු ලබාදෙන මෙන් ඉල්ලා කැලණියේ විභීෂණ දෙවියන් වෙත යැවූ සන්දේශය සැළලිහිණි සන්දේශය යි.
සන්දේශ සාහිත්‍යයේ ආරම්භය සිදු වූයේ ගම්පොළ යුගයේදී ය. ඒ තිසර හා මයුර සන්දේශ තුළිණි. එතැන් පටන් කෝට්ටේ යුගයේ රචිත සන්දේශ සාහිත්‍යය දක්වා සන්දේශ රචනා වූයේ පොදු අරමුණක් ඉටු කර ගැනීම සඳහා ය. මෙහිදී විවිධ චරිත නිරූපණයන් ඉස්මතු කොට දක්වා තිබෙන අතර එහිදී සමාජයේ විවිධ ස්ථරයන් දක්නට ලැබේ. ප්‍රභූ පැලැන්තිය හා සාමාන්‍ය ජනතාව වශයෙන් ද කොටස් කර දැක්විය හැකි අතර එම කොටස් අතුරින් පුරුෂයා නිරූපණය කර ඇති ආකාරය කෙසේද යන්න අවධානය යොමු කළ හැකි ය. එමෙන්ම සන්දේශ සාහිත්‍යය තුළින් තත්කාලීන සමාජය තුළ ජීවත් වූ පුරුෂයා ඒ ආකාරයෙන් ම නිරූපණය කර තිබෙනවා ද නැතහොත් එය මනංකල්පිත නිරූපණයන් ද යන වග මෙහිදී අප අවධානය යොමු කළ හැකි ය.
No comments:
Post a Comment